।। रामो विग्रहवान धर्मः ।।
                श्रीराम म्हणजे मूर्तिमंत धर्म-धर्मस्वरूप. ते भारतभूचा आत्मा आहेत. श्रीराम जन्मभुमीवर भव्य श्रीराम मंदिर व्हावे हा भारतीय मानस आहे. भारतीय मनोधारणेची शाश्वत प्रेरणा आहे . या राम मंदिरासाठी श्रीराम भक्तानी ४९२ वर्ष सतत संघर्ष केला आहे. भूतकाळात ७६ संघर्ष  वा लढयात ४ लाखाहून जास्त रामभक्तांनी बलिदान दिले. जवळ जवळ ३६ वर्षाच्या सुसुत्र व योजनाबध्द आंदोलनांमूळे संपुर्ण भारतीय जनमानसाने लिंग, जाती, धर्म, संप्रदाय , पंथ व क्षेत्र या भेदांपासून दुर होऊन एकात्मभावाने श्रीराम मंदिरासाठी अभूतपूर्व त्याग केला, बलिदान दिले या आंदोलन व संघर्षाचा परिणाम म्हणजे ९ नोव्हेम्बर १९८९ ला श्रीराम जन्मभूमीवर पूज्य संत मंडळीच्या उपस्थितीत अनुसुचित समाजाचे बंधु श्री.कामेश्वर चौपाल यांनी शीलान्यास केला.
                आस्थेचा हा विषय न्यायालयाच्या प्रदीर्घ प्रकियेत अडकून पडला होता. सत्र न्यायालयापासून तो सर्वोच्च न्यायालयापावेतो हा प्रवास राहिला. पौराणिक साक्ष पुरावे. पुरातत्व उत्खनन, रडार तरंगाची फोटो प्रणाली व ऐतिहासिक दस्तावेज या आधारावर सर्वोच्च न्यायालयाच्या ५ सदस्यीय पीठाने  ९ नोव्हेम्बर २०१९ ला एकमताने निर्णय दिला की, ”हि १४००० वर्ग फुट जमीन श्रीरामललांची आहे“. सत्य प्रतिष्ठित झाले, तथ्य व पुरावे या आधारावर श्रध्दा, आस्था व विश्वास यांचा विजय झाला .